మంత్రగత్తెలో మాతృత్వం

సాధారణం

దాదాపు పదహారేళ్ళ కింద మా ఇంటిల్లిపాదికీ చిన్నపిల్లల సినిమాలూ, అనిమేటెడ్ సినిమాలూ అలవాటయ్యాయి. ఆ అలవాటునించి పిల్లలు పెద్దయి బయటపడ్డా మేమిద్దరం చాలా పిల్లల సినిమాలు చూస్తూనే వుంటాం. పిల్లల సినిమాలూ- అనిమేటెడ్ సినిమాల ధర్మమా అని మాకు ఫెయిరీ టేల్స్ అన్నీ బాగా తెలిసిపోయాయి.

మునుపు ఇవన్నీ ఒకేలాగుండేవి. ఆపదల్లో వున్న అందమైన రాజకుమారిని అంతే అందగాడూ ధీరుడూ అయిన రాజకుమారుడో (లేదా ఇంకే వీరుడో) వచ్చి అమ్మాయిని రక్షించి, చేపట్టటమే కథ. (ఇప్పటికీ చాలా సినిమాలు అలాగే వుంటున్నాయని మీరంటే నేను చెప్పగలిగేదేమీ లేదు !!)
అయితే గత రెండూ మూడేళ్ళుగా హాలీవుడ్ లో తయారయ్యే ఈ ఫెయిరీ టేల్ సినిమాల్లో కొంచెం మార్పొచ్చింది. కొంచెం స్త్రీవాదం జొరబడిందన్నమాట. కథలో హీరో లేకపోతే యేమవుతుంది? ఆసలు హీరోనే యెందుకు అందరినీ రక్షించాలి? హీరోయిను తనని తానే రక్షించుకోవచ్చుకదా? ఇలాటి టైపన్నమాట.

రెండేళ్ళ కింద “బ్రేవ్” (2012) అనే అనిమేటెడ్ సినిమా వచ్చింది. నాకది భలే నచ్చింది. ఆ సినిమాలో హీరోయిన్ కి రాజకుమారుల ధ్యాసే వుండదు. పైగా, తమ రాజ్యపు సింహాసనం కోసం తానే పోటీలోకి దిగుతుంది, సిగ్గులు పడుతూ పోటీలో నెగ్గి తన చేయి పట్టుకోబోయేవాడి కోసం ఎదురు చూడకుండా!

ఆ తర్వాత “ఫ్రోజెన్” (2013) ! అందులోనూ అంతే. రాజకుమారులకూ, హీరోలకూ అసలే మాత్రమూ పాత్రలేని సినిమా. ఆక్క-చెల్లెళ్ళ ప్రేమా, అనుబంధాల గురించే అంతా! ఆ సినిమా పాటలూ కూడా సూపర్ హిట్టు, మాకూ పిచ్చి పిచ్చిగా నచ్చేసాయి.
ఇహ ఈ మధ్యే చూసిన “మెలిఫిసెంట్” (2014) సినిమా నచ్చిందంటే వింతేముంది?

“స్లీపింగ్ బ్యూటీ” కథ మనందరికీ తెలిసిందే. తన బారసాలకి పిలవని పేరంటంగా వచ్చిన మంత్రగత్తె చేతిలో శాపగ్రస్తురాలవుతుంది రాజకుమారి అరోరా. ఆ శాప ప్రభావం వల్ల పదహారోయేట చూపుడు వేలిలో సూది గుచ్చుకుని దీర్ఘకాలం నిద్రలోకి జారిపోతుంది. ఆమెని మనస్ఫూర్తిగా ప్రేమించే రాజకుమారుడొచ్చి ముద్దుపెట్టగానే లేచి కూర్చుంటుంది. ఇదే కథని పెర్స్ పెక్టివ్ మార్చి చాలా ఆసక్తికరమైన సినిమాని తీసారు.

అనగనగా ఒక పేద్ద రాజ్యం. దాన్ని చుట్టుముట్టి పేద్ద అడవి. ఆ అడవిలో చిత్ర విచిత్రమైన జంతువులూ, మంత్రగత్తెలూ, సంతోషంగా ఎగిరే ఫెయిరీలూ, అదొక అందమైన రంగురంగుల ప్రపంచం. ఆ ప్రపంచంలో అందరూ తనవాళ్ళేననీ, నవ్వులూ పువ్వులూ ఒకటేననీ నమ్మే అమాయకపు ఫెయిరీ మెలిఫిసెంట్. రాజ్యంలోని ప్రజలకీ, అడవిలోని జీవులకీ మధ్య పెద్ద అగాధం. వాళ్ళిద్దరినీ కలపాలంటే ఒక నాయకుడో లేక ప్రతి నాయకుడో (hero or a villan) రావాలన్న వ్యాఖ్యానంతో మొదలవుతుంది సినిమా.

ఒకనాడు- రాజ్యం నుంచి ఒక యువకుడు- స్టెఫాన్ అడవిలోకొస్తాడు. మెలిఫిసెంట్ తో స్నేహం చేస్తాడు. ఆమె బలమైన రెక్కలనూ, ఆకాశం వైపు దూసుకుపోయే మనస్తత్వాన్నీ చూసి ముచ్చటపడతాడు. పెద్దయ్యేలోగా ఇద్దరిలోనూ ప్రేమ చిగురిస్తుంది. అమాయకంగా తన రహస్యాలూ, భయాలూ అన్నీ అతనితో పంచుకుంటుంది మెలిఫిసెంట్. ఇలా వుండగా ఒకసారి-

పెద్దరాజ్యపు రాజుగారు జబ్బు చేసి మరణించబోతూవుంటాడు. తన కూతుర్ని చేపట్టి తన తర్వాత రాజ్యాన్నేలబోయేవాడు అడవిలో వున్న విచిత్ర జీవులను లోబర్చుకోవాలని ప్రకటిస్తాడు. ఆ ప్రకటన వినగానే స్టెఫాన్ లో ఆశపుడుతుంది.

అడవిలోకొచ్చి మోసంతో మెలిఫిసెంట్ రెక్కలు కత్తిరించేసి పారిపోతాడు. నిద్రనుంచి మేల్కొని రెక్కలు తెగిపోయాయని తెలుసుస్కున్న మెలిఫిసెంట్ బావురుమంటుంది. ప్రతీకారేఛ్ఛతో రగిలిపోతుంది. కాలినడకన అడవంతా తిరిగుతూ వుంటుంది. తన రంగురంగుల ప్రపంచాన్ని నలుపులోకి మార్చుకొని, మనుషులెవరూ మళ్ళీ రాకుండా అడవిని దుర్భేద్యంగా మారుస్తుంది.

ఒకరోజు అడవి చుట్టుపక్కలతిరుగుతూ మనుషులందరూ లోబర్చుకొని హింసిస్తూన్న ఒక కాకిని తన మంత్రబలంతో తప్పిస్తుంది. కృతఙ్ఞతతో ఆ కాకి ఎప్పటికప్పుడు రాజ్యంలో జరిగే విశేషాలన్నీ మెలిఫిసెంట్ కి చేరవేస్తూ వుంటుంది. స్టెఫాన్ అనుకున్నట్టుగానే రాజకుమార్తెని పెళ్ళాడి పెద్ద రాజ్యానికి రాజయ్యాడు. వాళ్ళకొక కూతురు కూడా పుట్టింది. ఆ రోజే బారసాల-

పగతో రగిలిపోతూ అక్కడికి చేరుకుంటుంది మెలిఫిసెంట్. పురిటికందుకి అందరితోపాటు తానూ బహుమతి ఇస్తానని చెప్పి, “నీకు పదహారేళ్ళు రాగానే చేతి వేలికి చూది గుచ్చుకుని మృత్యువులాటి నిద్రలోకి జారిపోతావు. నిజమైన ప్రేమ వున్న వాడొచ్చి ముద్దుపెట్టుకుంటే తప్ప లేవలేవు,” అని శాపం ఇచ్చి అక్కణ్ణించి వెళ్ళిపోతుంది మెలిఫిసెంట్.

ప్రపంచం లో నిజమైన ప్రేమ అనేది లేనే లేదనీ, రాజకుమారి అరోరా మరణించినట్టేననీ భావిస్తుందామె. స్టెఫాన్ తన కూతుర్ని రాజ్యానికి దూరంగా ఒక చిన్న కుటీరంలో ముగ్గురు ఫెయిరీల సం రక్షణ లో వుంచుతాడు. కానీ, కాకి ద్వారా అరోరా విశేషాలు ఎప్పటికప్పుడు మెలిఫిసెంట్ తెలుసుకుంటూనే వుంటుంది.

అడవిలోనే తిరుగుతూ వున్న మెలిఫిసెంట్ కి ఎప్పుడూ ఆడుకుంటూ వుండే రాజకుమారి అరోరా తారసపడుతూనే వుంటుంది. ఎంత కఠినంగా వుండాలనుకున్నా మెలిఫిసెంట్ మనసు ఆ చిన్నారిని చూసినప్పుడల్లా కరిగిపోతూనే వుంటుంది. ఆ పిల్ల నవ్వులూ, ముద్దు మాటలూ, అమాయకత్వమూ ఎక్కడో ఆమె హృదయానికి గాలం వేసి లాగుతూ వుంటాయి. అరోరా పెరిగి పెద్దదవుతూన్న కొద్దీ తనిచ్చిన ఘొర శాపాన్ని తలచుకుని పూర్తిగా నిరాశ పడిపోతుంది మెలిఫిసెంట్. నిజమైన ప్రేమ అనేదే ప్రపంచంలో లేనప్పుడు ఆ చిన్నదానికి శాపవిమోచనం ఎలా?
పదహారో పుట్టినరోజున తండ్రి కోట చేరుకుంటుంది అరోరా. ఆమె ఆ రోజు నిద్రలోకి జారిపోవడం తప్పదని తెలిసి తనకు అడవిలో తారసపడ్డ ఒక అందమైన యువకుడితో తనూ కోట చేరుకుంటుంది మెలిఫిసెంట్. ఆమె వస్తుందని తెలుసుకున్న స్టేఫాన్ ఎలాగైనా ఆమెని చంపేందుకు వ్యూహం సిధ్ధం చేసుకున్నాడు.

యువకుడు రాజకుమార్తెకి శాప విమోచనం కలిగించగలిగాడా? ఆసలు నిజమైన ప్రేమ అంటే యేమిటి? రాజ్యానికి అడవికీ మధ్య వారధి ఎవరు నిర్మించారు? హీరోనా? విలనా? ఆసలు హీరో, విలనూ, వంటి మాటలకి అర్థాలేమిటి? వంటి ప్రశ్నలన్నిటికీ సినిమా ముగిసేలోగా సమాధానం తెలుస్తుంది. సినిమా అంతా మెలిఫిసెంట్ గా ఎంజెలినీ జోలీ తన భూజాలపైనే మోసింది. పగా-ప్రేమా రెండిటి మధ్యా సంఘర్షణ చాలా సున్నితంగా వ్యక్తీకరించింది. మొత్తం నల్లటి దుస్తులు, ఎర్రటి లిప్ స్టిక్కూ ఆమె మానసిక స్థితికి అద్దం పట్టాయి. (నాకెందుకో ఆ రెండు రంగులూ ఆమె మనసులోని నిరాశా, కోపాలకి ప్రతీకలుగా వాడారనిపించింది.) రాజకుమార్తె అరోరాగా జోలీ కూతురు ఒక్క క్షణం మెరిసింది.

సంగీతంలో చెప్పుకోవాల్సింది “ఐ నోయూ- ఐ వాక్ విత్ యూ- వన్స్ అపాన్ ఎ డ్రీం” గురించి. ఈ పాట మొదటిసారి డిస్నీ తీసిన స్లీపింగ్ బ్యూటీ లోనిది. అందులో హుషారుగా హాయిగా వుండే పాట ఈ సినిమాలో విషాదంగా, లోతుగా అనిపిస్తుంది. బాగా తెలిసిన కథకి కొత్త కథనం తో ఈ సినిమా పిల్లలకేమో కానీ, ఆడవాళ్ళకి బాగా నచ్చొచ్చు.

——————–

ప్రకటనలు

One response »

  1. అవును “క్లాష్ ఆఫ్ ద టైటాన్స్”,”జాక్ అంద్ ద బీన్ స్టాక్”,”సిండరెల్లా” కధలకి కొత్త వెర్షన్లు కూడా బావుంటాయి!మనకీ మంచి కధలున్నాయి – మనవాళ్ళూ ఉన్నారు,యెందుకు?

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s